Wala na raw yatang hihigit na dakila,

Sa propesyong ito na aking ginagawa.

Tawag ng Maykapal, ito raw ay tadhana,

Isang bokasyong babago, sa bawat bata.

Guro, Propesor, Titser, Maestro o Maestra man,

Respeto’t dignidad, sami’y nakapangalan.

Ano’t- ano pa man ang inyong katawagan,

Kasipaga’t galling ay ‘di matatawaran.

Ang guro nga nama’y tambak sa mga gawain,

Naghahanda ng eksami’t banghay- aralin.

Mga riport at papeles pinapasa namin,

Huwag lamang masisira sa trabaho namin.

Bilang isang guro, akin nang napagtanto,

Kaakibat nito’y pagsasakripisyo.

Pansariling hangari’y isinasantabi ko,

Alang- alang sa mga batang dapat na matuto.

Ako’y GURO! Propesyong mahal na mahal ko,

Iaalay lamang, de- kalidad na pagtuturo.

Sa sinumpaang tungkulin ako ay nangako,

Maglilingkod ako sa Sambayanang Pilipino!

 

By: Mr. Rodolfo N. Ariola Jr. | SPED Teacher I | Cabcaben Elementary School | Mariveles, Bataan