Totoo na ang pagiging guro ay isang propesyong hindi matatawaran sapagkat sila ay ang dahilan sa likod ng marami pang propesyon. At ang maging guro ay isang malaking tagumpay lalo na kapag ang mga mag-aaral ay lubos ang pagpapahalaga sa kanila. Kaakibat nito ay ang malaking responsibilidad sa pagtuturo ng mga mag-aaral upang mahubog ang kaisipan, kakayanan at ang karakter nito at sa paghahanda sa kanila para sa kanilang kinabukasan. Subalit, hindi pa rin maiaalis na ito ay isang malaking hamon at isang sakripisyo. Upang mas maunawaan natin ang mga ito ay ating himay-himayin.
Una, pagtugon sa mga pangangailangan ng iba’t ibang uri ng mag-aaral: Ang mga guro ay kinakailangang magbigay ng pantay na pagkakataon at pagtuturo sa lahat ng kanilang mga mag-aaral, maging may kapansanan man o wala, may magandang kakayahan o hindi. Ang pagkakaroon ng iba’t ibang uri ng mag-aaral ay nagdudulot ng iba’t ibang uri ng pangangailangan sa pagtuturo, kaya’t kinakailangan ng mga guro na maghanap ng mga paraan upang masiguro na lahat ng kanilang mga mag-aaral ay nakakatugon sa kanilang pangangailangan.
Ikalawa, paghahanda ng mga materyales sa pagtuturo: Ang paghahanda ng mga materyales sa pagtuturo ay nangangailangan ng malaking panahon at dedikasyon upang maging epektibo. Kinakailangan rin ng mga guro na magplanong mabuti upang matiyak na ang kanilang mga materyales sa pagtuturo ay naaayon sa pangangailangan ng kanilang mga mag-aaral.
Ikatlo, pagalalay at pag-aasikaso ng mga mag-aaral: Ang mga guro ay kinakailangan ding alalayan ang mga mag-aaral, kung ano ang kanilang ginagawa sa loob ng silid-aralan at sa labas ng eskuwelahan upang mas mabigyan ng impormasyon hinggil sa kalagayan ng mag-aaral. Kinakailangan ng mga guro na maging mapanuri upang masiguro na ang mga mag-aaral ay laging nasa tamang landas.
Ikaapat, mga hamong personal: Bilang mga guro, kinakailangan din nilang harapin ang mga hamong personal, tulad ng stress, pagod at pagkaburnout. Kailangan nilang maghanap ng paraan upang maibsan ang kanilang personal na mga hamon upang maging mas epektibo sa kanilang trabaho.
Ikalima, mga hamong teknikal: Dahil sa patuloy na pagbabago ng teknolohiya, kinakailangan din ng mga guro na maging updated sa mga teknikal na hamon, tulad ng paggamit ng mga teknolohikal na kasangkapan sa pagtuturo at paghahanda ng mga online na klase na minsan ay hindi kayang punan lagi ng mga guro.
Ngunit sa kabila ng mga ito, pursigido at determinado ang mga guro na maibigay ang lahat upang mas maibigay ang higit pa sa pangangailangan ng mga mag-aaral at ang kailangan ng mga guro ay suporta sa lahat ng aspeto.
By: Madelene Joy M. Ricio | Teacher I | Bataan National High School SHS
