Tagahubog, tagapanday ng murang isipan

Mistulang iginuguhit sa papel ang kapalaran

Mga munting anghel na dumating sa buhay

Sa palad ng isang  tagapaghulma sa lipunan.

Sa bawat oras at araw  na dumaraan

Tanging hangad ay magpunla ng kaalaman

Mga butil ng karununga’y inilalaan

Sa mga inosente at uhaw na isipan.

Pangalawang magulang  kung turingan

Mga mamamayan nitong ating bayan

Sa kanyang balikat nakasalalay

Pag-unlad sa buhay ng mga kabataan.

Ordinaryong tao kung siya’y pagmasdan

Sa bawat galaw tiyak may kabuluhan

Palaging iniisip magandang kinabukasan

Sa puso niya’y  umusbong ang pagmamahal.

Kapakanan ng iba laging inuuna

Saya sa mukha ‘nya ang ipinakikita

Kailanman hindi magpapahalata

Kahit durog ang puso sa daming problema.

Di matatawaran sakripisyong taglay

Di mapapantayan kahit sino pa man

Iyan ang gurong manlililok na tunay

Isang taong namugad ang kabutihan.

By: Willia C. Bacsal | Master Teacher I | Olongapo City National High School | Olongapo City